Münhenin "Bavariya" klubu "Real Madrid"in vingeri Rodriqo Qoeslə ciddi maraqlanır və onun transferi üçün rəsmi təklif göndərmək niyyətindədir.
Oxu.Az xəbər verir ki, bu barədə jurnalist Eduardo İnda "El Chiringuito" nəşrinə müsahibəsində bildirib.
Onun sözlərinə görə, 23 yaşlı braziliyalıya İngiltərənin "Arsenal", "Çelsi" və "Mançester Siti" klubları da elçi düşüb. Hətta "Çelsi" artıq futbolçunun agenti ilə də əlaqəyə girib, lakin "zadəganlar" "Real Madrid"ə rəsmi müraciət ünvanlamayıb.
Madrid klubunun rəhbərliyi açıq şəkildə bildirir ki, onlar yalnız 80 milyon avro və daha yuxarı məbləğdə olan təklifləri nəzərdən keçirməyə razıdırlar. Qeyd olunur ki, bunu nəzərə alan "Bavariya" Rodriqo üçün böyük məbləğdə maliyyə ayırmağa da hazırdır.
Xatırladaq ki, PSJ klubu da Rodriqonun transferində maraqlıdır, hətta gənc futbolçunun agenti ilə danışıqlar da aparılıb və Paris klubu "Real Madrid"in ulduzu üçün rəsmi təklif göndərməyə hazırlaşır.
