Berlində müşahidə olunan anomal istilər fonunda polis sakinləri və turistləri sərinlətmək üçün su şırnaqlarından istifadə edib.
Oxu.Az "Tagesspiegel" qəzetinə istinadən xəbər verir ki, xüsusi texnikanın işlədiyi ilk məkan Brandenburq qapısının ətrafı olub.
Polisin məlumatına görə, indiyədək bu məqsədlə təxminən 18 min litr su sərf edilib.
Sərinləşdirmə tədbirləri Almaniyanın paytaxt regionunu bürüyən ekstremal istilərə qarşı görülən tədbirlərin bir hissəsi olub. Berlində hava temperaturu yeni rekord həddə çataraq müsbət 39.9 dərəcə təşkil edib.
Şəhərdə təcili xidmət orqanlarının fəaliyyəti gücləndirilib. Yanğınsöndürənlər çağırışların sayının artdığını bildirirlər, polis isə ictimai yerlərdə nəzarəti və patrul xidmətini artırıb.
Anomal istilər səbəbindən artıq onlarla tədbir təxirə salınıb. Şəhər hovuzlarının qarşısında uzun növbələr yaranıb, infrastrukturun bəzi elementləri isə fasilələrlə fəaliyyət göstərir. Bildirilir ki, xüsusilə işıqforların işində nasazlıqlar müşahidə olunur.
Anomal isti Avropanın bir çox ölkəsinə təsir edib - belə ki, iyunun 24-də Fransada meteoroloji müşahidələrin aparıldığı tarixdən bəri ən isti gün qeydə alınıb. Həmin gün ölkə üzrə sutkalıq orta hava temperaturu müsbət 29.97 dərəcə təşkil edib.
Anomal isti fonunda ölüm hallarının artması ilə əlaqədar Fransada dəfn xidmətləri həddindən artıq yüklənib.
