Böyük Britaniya hökuməti elan edib ki, ölkədə sığınacaq almış şəxslər işləməyə başladıqdan sonra yaşayış və təminat xərcləri üçün təxminən 10 000 funt sterlinqi geri qaytarmalı olacaqlar.
Oxu.Az xəbər verir ki, bu barədə məlumatı "BBC News" kanalı daxili işlər naziri Şabana Mahmudun açıqlamasına istinadən yayıb.
"Sığınacaq almış şəxslərə dəstək təkcə hüquq deyil, həm də öhdəlikdir. İnsanlar Britaniya xalqının səxavətinə qarşılıq olaraq iqtisadiyyata töhfə verə biləcək səviyyəyə çatdıqda biz onlardan bu addımı atacaqlarını gözləyirik", - deyə nazir bildirib.
Məlumata görə, qaçqın statusu almış və ya müddətsiz yaşamaq hüququ qazanan yetkinlik yaşına çatmış miqrantlar daimi yaşayış icazəsi üçün müraciət etməzdən əvvəl bu vəsaiti hissələrlə qaytarmalıdırlar. Böyük Britaniyanın Daxili İşlər Nazirliyi tərəfindən aylıq ödənişlərə başlamaq üçün tələb edilən minimal gəlir səviyyəsi hələlik təsdiqlənməyib, ancaq gələcəkdə kompensasiya məbləğinə dəyişiklik etmək hüququ qorunub-saxlanılacaq.
