Böyük Britaniyada vəftiz mərasimi zamanı bədbəxt hadisə baş verib.
Oxu.Az "AP News" nəşrinə istinadla xəbər verir ki, mərasimi icra edən qadın pastor Robert Smit adlı şəxsin ölümünə səbəb olmaqda ittiham edilir.
Faciə 8 oktyabr 2023-cü ildə Birminhemdə yerləşən şəxsi evin arxa həyətində baş verib. "Life Changing Ministries" dini icmasının keçirdiyi mərasim üçün şişmə uşaq hovuzundan istifadə olunub. Hadisənin ən sarsıdıcı tərəfi odur ki, mərasim "Facebook"da canlı yayımlanıb və onlarla insan 61 yaşlı Robert Smitin suda boğulma anını izləyib.
İstintaqın versiyasına görə, kişinin ölümü mərasim zamanı təhlükəsizlik qaydalarını pozan din xadiminin səhlənkar hərəkətlərinin nəticəsidir. 48 yaşlı pastor Şeril Bartliyə qarşı ehtiyatsızlıqdan adamöldürmə maddəsi ilə ittiham irəli sürülüb.
Hazırda məhkəmə prosesi davam edir. İş üzrə növbəti iclasın 14 may tarixində Birminhem Magistrat Məhkəməsində keçirilməsi planlaşdırılır.
