Braziliyanın yenidən seçilmiş prezidenti Luis İnasiu Lula da Silva ölkə tarixində ən çox seçici səsi toplayaraq yeni rekorda imza atıb.
Oxu.Az xəbər verir ki, bu barədə Braziliyanın Ali Seçki Məhkəməsinin (Mərkəzi Seçki Komissiyasının funksiyalarını yerinə yetirir) açıqladığı məlumatlarda bildirilir.
Protokolların 100%-nin sayılması nəticəsində hakim İşçi Partiyasının lideri 64 256 232 seçicinin (51.79%) dəstəyini qazanıb. Bununla da o, 2022-ci il seçkilərində müəyyən etdiyi öz rekordunu yeniləyib: həmin vaxt ikinci turda sabiq prezident Jair Bolsonaruya qarşı onun lehinə 60 345 999 braziliyalı (50.90%) səs vermişdi.
Onun sağçı müxalifətdən olan rəqibi, senator Flavio Bolsonaru isə indiki seçkilərdə 59 826 041 səs (48.21%) toplayıb.
Lula da Silva Braziliya tarixində ali dövlət postunu dördüncü dəfə tutacaq ilk siyasətçi və bu normanın 1997-ci ildə tətbiq edilməsindən bəri yenidən seçilmə sayına görə rekordçu (hazırda onun hesabında iki yenidən seçilmə var) olub. Həmçinin, Braziliya lideri ölkə tarixində birinci turda geridə qaldıqdan sonra yekun qələbə qazanan ilk namizəddir. Belə ki, ilk turda o, Flavio Bolsonarunun 47.03%-nə qarşı 45.16% səs toplamışdı.
Bundan başqa, seçkilərdə qalib gələn Silva Braziliya tarixinin ən yaşlı prezidenti olacaq. Vəzifəyə başladığı vaxt siyasətçinin 81 yaşı tamam olacaq. İnauqurasiya mərasimi 2027-ci ilin yanvar ayında baş tutacaq. Əgər Lula da Silva dördüncü mandatının sonunadək fəaliyyət göstərərsə, postunu 2031-ci ilin yanvarında 85 yaşında tərk edəcək. Əvvəlki yaş rekordu da elə dövlət başçısına məxsusdur: 2023-cü ildə o, 77 yaşında üçüncü müddətinə başlamışdı. Ondan əvvəlki rekordçu isə Dilma Russeffin impiçmentindən sonra 2016-cı ildə - 75 yaşında prezident postunu tutan Mişel Temer (2016-2018) idi.
Seçkidə məğlub olan Flaviu Bolsonaru isə səsvermənin yekunlarını tanımaqdan imtina edib və nəticələrin ləğv olunmasını tələb edib.
Məhkəmə orqanlarının səsvermə vaxtının iki saat artırılması barədə qərarını şərh edən siyasətçi bildirib:
"Bu gün baş verənlər qəbuledilməz idi. Tarixdə ilk dəfə olaraq bir qərarla seçki prosesinin qaydaları dəyişdirilir. Seçkilər ləğv edilməli idi. Belə bir nəticəni tanımaq qeyri-mümkündür".
