Britaniyada hannibalizmi sübut edən dəlillər tapılıb

Oksford Universitetinin alimləri Britaniyanın məşhur Çeddar dərəsi yaxınlığında ölkənin tarixində ən qədim zamanlardan bəri hanniballizmlə (adamyeyənliklə) müşayiət olunan ən amansız qırğınlardan birinin dəlillərini aşkar ediblər.

Oxu.Az-ın xəbərinə görə, araşdırmanın nəticələri "Anquity" jurnalında dərc olunub.

Elmi məqalə dərin mədənin dibində ən azı 37 nəfərin - kişi, qadın və uşaqların qalıqlarının aşkar edildiyini bildirir. Onların tarixi eramızdan əvvəl 2200-2000-ci illərə aiddir.

Kəllə sümüklərinin ağır zərbələr nəticəsində ölümcül xəsarətlər aldığı qeydə alınıb. Tədqiqat zamanı, həmçinin, məlum olub ki, qurbanların sümük iliyinin çıxarılması üçün əl-ayaqları qəsdən kəsilib. Qol və ayaq sümüklərində tapılan diş izləri adamyeyənlik faktlarını təsdiqləyib.

Araşdırmanın aparıcı müəllifi və Oksford Universitetinin professoru Rik Şultinq qeyd edib ki, qalıqlar uzun müddət baxımsız qalıb. Sümüklər 50 il əvvəl Çeddar dərəsi yaxınlığında təxminən 15 metr dərinlikdə olan mədəndə kəşfiyyat aparan speleoloqlar tərəfindən aşkar edilib.

Yalnız bu yaxınlarda kolleksiyanın təkrar tədqiqi zamanı alimlər tapıntının əsl əhəmiyyətini üzə çıxara biliblər. Bu qalıqlar indi o dövrün sosial və mədəni aspektləri, həmçinin Erkən Tunc dövründə zorakılıqdan istifadə haqqında unikal fikirlər təqdim edir.

Alimlər, həmçinin hesab edirlər ki, kütləvi qətllər hədə-qorxu aktı və güc nümayişi kimi xidmət edirdi: parçalanma, baş dərisinin soyulması və sonrakı istehlak digər icmalar üçün xəbərdarlıq ola bilərdi. Bu hadisə göstərir ki, zorakılıq və qəddarlıq qədim insanlar üçün həyatın bir hissəsi idi, baxmayaraq ki, onların miqyası və motivləri hələ də məlum deyil.