Çin XİN ticarət müharibəsi barədə: "Qorunmaq üçün lazımi tədbirlər görülüb"

Çin Xarici İşlər Nazirliyi ABŞ-ni hazırkı rüsum müharibəsini başlamaqda günahlandırıb və əks tədbirlərin məcburi xarakter daşıdığını vurğulayıb.

Oxu.Az-ın TASS-a istinadən xəbərinə görə, bu sözləri brifinqdə çıxışı zamanı Çin XİN-in rəsmi nümayəndəsi Lin Tszyan deyib.

O, bunu ABŞ Prezidenti Donald Trampın Pekin və Vaşinqton arasındakı ticarət qarşıdurmasında topun Çinin tərəfində olmasına dair bəyanatını və Ağ Evin məhsullara 245% rüsum tətbiq etmək planlarını şərh edərkən bildirib.

"Mövcud ticarət müharibəsi ABŞ tərəfindən başladılıb. Çin öz qanuni hüquq və maraqlarını, eləcə də beynəlxalq ədalətin qorunması üçün lazımi tədbirləri görüb", - deyə Lin Tszyan qeyd edib.

Diplomat, həmçinin vurğulayıb ki, Çin ticarət və rüsum müharibələrini istəmir, lakin eyni zamanda, bundan da qorxmur.