Çində qeyri-adi hadisə: Qadın mükəmməl danışdığı ingilis dilini unutdu

Çində bir qrup həkim nadir rast gəlinən bir hadisə ilə qarşılaşıb - 24 yaşlı qadın mükəmməl danışdığı ingilis dilində ünsiyyət qurmaq qabiliyyətini qəfildən itirib və bu, həkimləri heyrətləndirib.

Oxu.Az xəbər verir ki, bu barədə "Oddity Central" nəşri yazıb.

Qadının sözlərinə görə, o, qəfildən özünü pis hiss edib və şiddətli baş ağrıları başlayıb.

"O, mandarin və kanton dialektlərində sərbəst danışırdı, lakin qəribə şəkildə yalnız ingilis dili bacarığını itirmişdi", - deyə Quançjou şəhərində yerləşən Quandun əyalət xəstəxanasının neyrocərrahiyyə şöbəsinin müdiri Van Fen bildirib.

Həkimlər əvvəlcə bu vəziyyəti beyin şişi ilə əlaqələndirsələr də, MRT müayinəsi beynin sol nahiyəsində qanaxma olduğunu göstərib. Məhz bu qanaxma qadının ingilis dilində danışmaq funksiyasını müvəqqəti olaraq sıradan çıxarıb.

Neyrocərrahiyə əməliyyatı uğurla başa çatdıqdan sonra qadın ingilis dili qabiliyyətini tam bərpa edib və xaricdəki təhsilinə davam edə bilib.

Hadisə sosial şəbəkələrdə geniş rezonans doğurub. Bir çox istifadəçi bu hekayəyə yumorla yanaşaraq "xarici dil öyrənmək üçün əməliyyat" ideyasına zarafatla münasibət bildiriblər:

"Doktor, alman dili üzrə də əməliyyat keçə bilərəm?", - deyə şərhçilərdən biri yazıb.