Rusiyanın Dağıstan Respublikasının Mahaçqala hava limanında gömrük əməkdaşları 177 milyon rubl (təxminən 2.2 milyon dollar) məbləğində nağd pulun ölkədən qanunsuz yolla çıxarılmasının qarşısını alıblar.
Oxu.Az Mk.ru-ya istinadən xəbər verir ki, bu barədə Rusiya Federal Gömrük Xidməti məlumat yayıb.
Məlumata əsasən, böyük məbləğdə pul vəsaiti Bişkekə uçmağa hazırlaşan 38 yaşlı Rusiya vətəndaşının çamadanlarından aşkar edilib. Saxlanılan şəxs həmin pulları daşınmaz əmlak satışından əldə etdiyini iddia edərək, ilkin alqı-satqı müqaviləsini və məxaric orderlərini gömrükçülərə təqdim edib. Lakin yoxlama zamanı sənədlərin Rusiyanın qanunvericilik tələblərinə cavab vermədiyi müəyyən olunub və valyutanın ölkədən çıxarılmasına qadağa qoyulub.
Faktla bağlı araşdırma aparılır.
