Məşhur astrofizik Stefan Havking süni zəkanın bəşəriyyətdə insanlığın sonunu gətirə biləcəyi barədə xəbərdarlıq edib.
Oxu.Az-ın ANS PRESS-ə istinadən məlumatına görə, ingilis alim BBC-yə verdiyi açıqlamada düşünən maşınlar istehsal etmək üçün çəkilən xərclərin insan varlığına təhdid olduğunu bildirib.
İndiyə qədər inkişaf etdirilən primitiv süni zəka aparatlarının son dərəcə faydalı olduğunu deyən Stefan insan zəkasından üstün olan aparatların kəşfi çox ciddi fəsadlara yol aça biləcəyini söyləyib:
“Süni zəka öz-özünü inkişaf etdirməyə davam edə bilər və hətta özünü yenidən təkmilləşdirmək qabiliyyətinə də malik ola bilər. Son dərəcə yavaş bir bioloji təkamüllə insanlar bu cür bir güclə yarışa bilməz. Süni zəka yer üzündə insan irqinin sonunu gətirə bilər”.
Astrofizikin fikrincə ağıllı maşınların dövriyyə buraxılması milyonlarla insanın işsiz qalmasına və dünyada böhrana yola açacaq.
Qeyd edək ki, skleroz xəstəliyindən əziyyət çəkən alim ünsiyyəti belə kompüter texnologiyaları vasitəsi ilə qurur.
