Rok musiqiçisi Elvis Preslinin mahnılarının hüquq sahibləri, o cümlədən "Authentic Brands Group" şirkəti süni intellekt tərtibatçısı "Anthropic"ə qarşı kollektiv iddia qaldırıblar.
Oxu.Az NBC News-a istinadən xəbər verir ki, iddiaçılar şirkəti Presliyə məxsus 274 mahnının müəllif hüquqlarını pozmaqda ittiham edirlər.
Onların iddiasına görə, "Anthropic" dil modellərini öyrətmək məqsədilə müəllif hüquqları ilə qorunan mahnı sözlərindən icazəsiz istifadə edib.
Hüquq sahibləri bildirirlər ki, şirkətin hüquq pozuntuları "Claude" çat-botunun hazırlanması mərhələsindən başlayıb və hazırda da davam edir. Onların sözlərinə görə, istifadəçilər çat-bot vasitəsilə müəllif hüquqları ilə qorunan mahnı mətnlərini və ya onların uyğunlaşdırılmış versiyalarını yarada bilirlər.
"Anthropic"in nümayəndəsi isə şirkətin iddiada irəli sürülən ittihamlarla razılaşmadığını və məhkəmədə öz mövqeyini müdafiə etmək niyyətində olduğunu bildirib.
Bu, "Claude" çat-botunun tərtibatçısı "Anthropic"ə qarşı müəllif hüquqlarının pozulması ilə bağlı irəli sürülən ilk iddia deyil.
2025-ci ildə şirkət çat-botun təlimi zamanı kitablarından qanunsuz istifadə edildiyini iddia edən müəlliflərlə barışıq sazişi bağlayıb. Razılaşmaya əsasən, "Anthropic" ümumilikdə 1.5 milyard dollar ödəməyi öhdəsinə götürüb.
Avqustun sonunda isə şirkətə qarşı daha bir iddia qaldırılıb. "Sony Music" və "Warner Music" səsyazma şirkətləri "Anthropic"i "Claude"un hazırlanması zamanı müəllif hüquqları ilə qorunan musiqi əsərlərindən qanunsuz istifadə etməkdə ittiham ediblər.
