Ermənistanın Dərələyəz (Vayots Dzor) bölgəsinin hərbi komissarı Qaqik Qriqoryan həbs olunub.
Oxu.Az xəbər verir ki, bu barədə Ermənistan mətbuatında məlumatlar yayılıb.
Məlumata görə, tutulan komissar müdafiə nazirinin müavini Arman Sarqsyanın ən yaxın adamlarından biri hesab olunur. Qeyd olunur ki, polkovnik Qriqoryan korrupsiya işi ilə əlaqədar olaraq saxlanılıb.
Məlumata görə, hərbi komissarın xüsusi bir hərbi keçmişi yoxdur və o bu vəzifəyə məhz şəxsi əlaqələri sayəsində təyin edilib. Məmurun iş otağı artıq iki həftəyə yaxındır ki, möhürlənmiş vəziyyətdədir və vətəndaşlar ehtiyac duyduqları arayışları əldə edə bilmirlər.
Polkovnikin qardaşı Gevork Qriqoryan isə Vayk polis şöbəsinin rəisi vəzifəsini tutur. İstintaq qurumları hərbçinin həbs edilməsi barədə yayılan məlumatlara hələlik heç bir rəsmi münasibət bildirməyib.
