Fransada oktyabrın 24-də baş verən kütləvi iğtişaşlarla əlaqədar 1 300-dən çox şəxs saxlanılıb.
Oxu.Az bu barədə "Le Figaro" nəşrinə istinadən xəbər verir.
Parisdə 142 nəfər saxlanılıb, onların 126-sı həbs olunub. Oktyabrın 24-də nümayişçilərin sayı oktyabrın 17-dəki göstərici ilə eyni olsa da, təhlükəsizlik tədbirlərinin daha yaxşı təşkil edilməsi sayəsində fəsadlar daha az olub. Parisdə yalnız bir mağaza qarətçilərdən zərər çəkib, polis avtosalona müdaxilə etmək istəyən xuliqanların qarşısını dərhal kəsib.
Ümumilikdə Fransa üzrə ötən gün 24 qarət hadisəsi qeydə alınıb. Müqayisə üçün qeyd edək ki, bir həftə əvvəl 1 500 ticarət nöqtəsi qarət edilmişdi. Buna baxmayaraq, çoxlu sayda mağazaya zərər dəyib, iğtişaşların qarşısını alarkən 53 polis əməkdaşı xəsarət alıb. Azı iki etirazçı ağır yaralanıb.
Oktyabrın 24-də bütün Fransa üzrə həmkarlar ittifaqları və tələbə hərəkatlarının iştirakı ilə kütləvi nümayişlər keçirilib.
Daxili İşlər Nazirliyinin məlumatına görə, 24 oktyabr aksiyalarında 410 000 nəfər iştirak edib. Həmkarlar ittifaqı isə küçələrə çıxanların sayının 800 000 nəfər olduğunu bildirib.
