Ermənistanda həbs olunmuş Gümrü meri Vardan Qukasyana qarşı ölkənin suverenliyindən imtinaya çağırış etdiyinə görə yeni cinayət işi açılıb.
Oxu.Az TASS-a istinadən xəbər verir ki, bu barədə onun vəkil komandasının bəyanatında bildirilib.
Bir neçə gün öncə təhlükəsizlik qüvvələri Gümrü Şəhər Meriyasında axtarış aparıblar. Ermənistanın Korrupsiyaya Qarşı Mübarizə Komitəsi rüşvət istintaqı çərçivəsində bələdiyyə sədri Qukasyan da daxil olmaqla səkkiz nəfərin həbs olunduğunu elan edib. Mer barəsində məhkəmə qərarı ilə iki ay müddətinə həbs qətimkan tədbiri seçilib.
