Gündə nə qədər pendir yemək sağlamlığa zərər vermir? - Rusiyalı həkimdən açıqlama

Sağlamlığa zərər vermədən gündə 50 qramdan çox olmayan miqdarda pendir yemək olar.

Oxu.Az-ın Lenta.ru-ya istinadən xəbərinə görə, bu barədə rusiyalı qastroenteroloq Yevgeni Belousov danışıb.

Onun sözlərinə görə, gündə 30-50 qram pendir yemək artıq çəki almadan və sağlamlıq problemlərinə yol vermədən kalsium və zülal qəbul etməyə imkan verir.

Eyni zamanda, Belousov bildirib ki, həddindən artıq yemək, xüsusən də porsiya ölçüsü 100 qramı keçərsə, əlavə çəki artımı təhlükəsi yaradır. Bu da öz növbəsində, xüsusən də ürək, qan damarları və böyrəklər ilə bağlı problemləri olan, istənilən yüksək kalorili qidanın zərərli olduğu insanlarda xəstəliyin inkişafına gətirib çıxara bilər.

"Parmezan və qryuyer kimi bərk və yarımbərk pendirlər ən faydalı pendirlər hesab olunur, çünki onların tərkibində yüksəkkeyfiyyətli protein, həmçinin sağlam sümüklər və dişlər üçün zəruri olan əhəmiyyətli miqdarda kalsium var. Həmçinin bu pendirlər yumşaq pendirlərə nisbətən daha az kalorilidirlər", - deyə qastroenteroloq qeyd edib.