Miqrendən əziyyət çəkən insanlara "düşmən" məhsullar açıqlandı: Pendir, şokolad...

"Pendir miqreni təhrik edə bilər, həmçinin artriti, hipertoniyası və artıq çəkisi olan insanlara məhdudlaşdırılması tövsiyə olunur. Pendirin tərkibindəki tiramin və qlutamin turşusu ağrı tutmalarına səbəb ola bilər".

Oxu.Az-ın vm.ru-ya istinadla verdiyi məlumata görə, bu barədə tanınmış rusiyalı nevroloq Rüstəm Qayfutdinov xəbərdarlıq edib.

Onun sözlərinə görə, ümumiyyətlə tiramin ifraz edən qıcqırma məhsulları miqrenə səbəb ola bilər.

"Bərk pendir növləri, ağ şərablar, şampan, qoz-fındıq və şokoladın bu patologiyaya meyilli olan insanlarda miqreni təhrik etməsi çoxdan məlum faktdır", - deyə Qayfutdinov bildirib.

Ekspert qeyd edib ki, miqrenə ən çox gənc qadınlar meyillidir. Kişilər miqrendən əhəmiyyətli dərəcədə az əziyyət çəkirlər.

"Miqren baş ağrısı, ürəkbulanma, qusma, başgicəllənmə, parlaq işığa və uca səslərə, qoxulara dözümsüzlük kimi xarakterik simptomlarla müşayiət olunur. İnsan hər şeydən qıcıqlanır, tək qalmaq, dünyadan təcrid olunmaq və yatmaq istəyir. Yuxu, isti duş və cinsi əlaqə miqrenə kömək edə bilər", - deyə nevroloq bildirib.

Bununla belə, həkim vurğulayıb ki, əksər hallarda miqreni qidalar deyil, yuxusuzluq, stress və emosional yüklənmələr təhrik edir.