Alimlər ilk dəfə Günəş səthindəki partlayıcı aktivlikləri - xüsusilə günəş ləkələrini - 8K yüksək təsvir keyfiyyəti ilə görüntüləyə biliblər.
Oxu.Az bu barədə space.com-a istinadla xəbər verir.
Günəş ləkələri - səthin digər hissələrinə nisbətən daha aşağı temperaturda olan, lakin güclü maqnit sahəsi ilə seçilən qaranlıq bölgələrdir. Onlar günəş alovlanmaları və koronar kütlə atılmaları kimi partlayışların mənbəyi hesab olunurlar. Bu partlayışlar Yerə çatan zaman geomaqnit qasırğaları yarada bilər.
Almaniyanın Potsdam Astrofizika İnstitutunun alimləri İspaniyanın Tenerife adasında yerləşən "Teide" Rəsədxanasındakı "Vacuum Tower" teleskopuna yeni kameralar quraşdıraraq bu görüntüləri əldə ediblər. Bu kameralar saniyədə 25 kadrla 8000x6000 piksel ölçüsündə 100 qısa ekspozisiyalı şəkil çəkərək onları birləşdirir. Bu üsul Yerin atmosferindən qaynaqlanan təhrifləri azaldaraq, Günəş səthində təxminən 100 kilometr ölçüsündə detalları göstərməyə imkan verir.
Yeni görüntülər, Günəşin təxminən 1/7 hissəsini əhatə edən, 200 000 kilometrə qədər olan sahələrdə plazma axınları və maqnit sahəsinin mürəkkəb strukturlarını əks etdirir. Bu tədqiqatlar kosmik hava şəraitinin proqnozlaşdırılması üçün mühüm əhəmiyyət daşıyır və rabitə, elektrik şəbəkələri kimi texnologiyalara təsiri daha yaxşı izləməyə imkan verir.
