Gürcüstanın Marneuli rayonunda bir neçə azərbaycanlının əmlakı məcburi qaydada ictimai ehtiyac üçün müsadirə olunacaq.
Oxu.Az xəbər verir ki, bu barədə yerli mətbuatda məlumat yayılıb.
Məlumata görə, Rustavi-Qırmızı körpü və Rustavi-Sadaxlı avtomobil yollarının tikintisinə görə bir neçə vətəndaşın əmlakı məcburi qaydada dövlət nəfinə keçiriləcək.
Qeyd olunur ki, Gürcüstan Avtomobil Yolları Departamentinə layihə ərazisinə düşən daşınmaz əmlak üzərində ekspropriasiya hüququ verilib.
Zəruri ictimai ehtiyac kimi qiymətləndirilən layihəyə düşən əmlaklar dövlət tərəfindən kompensasiya ödənilməklə mülkiyyətin məcburi alınması qaydasında həyata keçiriləcək.
Bildirilib ki, departament daşınmaz əmlakın satın alınması ilə bağlı xüsusi mülkiyyətçilərlə razılıq əldə edə bilmədiyi üçün ekspropriasiya yolu ilə mülkiyyət hüququnun məcburi alınmasına ehtiyac yaranıb.
Məlumata görə, qərardan bir ay ərzində Tbilisi Şəhər Məhkəməsinin inzibati işlər kollegiyasına şikayət verilə bilər.
