Havay adalarından birində baş verən yanğınlar nəticəsində ölənlərin sayı 80 nəfərə çatıb.
Bu barədə Havayın Maui dairə idarəsi məlumat verib.
“Xilasedicilər Lahaina, Pulexu və Kixei şəhərlərində yanğınların söndürülməsi və lokallaşdırılması işlərini davam etdirirlər”, - deyə dairənin saytında yerləşdirilmiş məlumatda bildirilib.
Qeyd edək ki, Havay arxipelaqının kiçik adalarından biri olan Maui adasında meşə yanğını çərşənbə günü başlayıb. Güclü külək səbəbindən yanğın qısa zamanda turistik Lahaina şəhərinə də keçib. Nəticədə şəhər bütünlüklə yanıb, insanlar yanğından uzaqlaşmaq üçün okeana üz tutublar. Onlar sahil mühafizəsi və könüllülər tərəfindən xilas ediliblər.
11:26
Havayda meşə yanğınları səngimək bilmir.
Son məlumatlara görə, artıq 67 nəfər həyatını itirib.
Maui dairəsi rəsmilərinin verdikləri məlumata görə, adasının keçmiş paytaxtı Lahainada başlayan yanğının qarşısı hələ də alınmayıb, ölənlərin sayı artıb.
“Bu insanlar yanğından xilas olmağa çalışarkən açıq havada ölüblər”, - deyə Havay adalarının qubernatoru Coş Qrin bildirib.
Ölənlərin yenilənmiş sayını nəzərə alsaq, bu meşə yanğını ştatın tarixində ən böyük təbii fəlakətdir. Həmçinin, bu, ştat tarixində maddi ziyana görə ikinci ən böyük fəlakət hesab olunur.
Havayda meşə yanğınları güclü istilər səbəbindən başlayıb. “Dora” qasırğasının yaratdığı küləklər yanğının yüzlərlə kilometr yayılmasına gətirib çıxarır. Təkcə avqustun 10-da yanğın nəticəsində azı 17 nəfər həlak olub.
Qubernator Qrinin sözlərinə görə, təəssüf ki, ölənlərin sayı əhəmiyyətli dərəcədə arta bilər.
Mənbə: “The Guardian”
