"Honda" "Nissan"la birləşmək üçün ŞƏRTİNİ AÇIQLADI

Yaponiyanın "Honda" avtomobil nəhəngi 60 milyard dollar dəyərində birləşmiş avtomobil konserninin yaradılması üçün "Nissan"la danışıqlar masasına qayıtmağa bir şərtlə hazır olduğunu bildirib: "Nissan"ın hazırkı baş direktoru Makoto Uçida istefa verməlidir.

Oxu.Az-ın verdiyi məlumata görə, bu barədə "Financial Times" (FT) öz mənbələrinə istinadla xəbər verib.

Bildirilir ki, məhz Uçida potensial sövdələşmənin əsas təşəbbüskarlarından biri olub, lakin təfərrüatların razılaşdırılması prosesində onun "Honda"dan olan həmkarı Tosixiro Mibe ilə münasibətləri ciddi şəkildə pozulub. Uçidanın 2026-cı ilə qədər "Nissan"ın başında qalmaq planlarına baxmayaraq, danışıqların uğursuzluğu şirkətin direktorlar şurasının qeyri-rəsmi olaraq onun işdən çıxarılmasını müzakirə etməsinə səbəb olub.

Sövdələşmənin pozulmasından sonra "Nissan"ın vəziyyəti olduqca qeyri-sabit görünür. Şirkət restrukturizasiya üçün vəsaitə ehtiyac duyur, lakin onun qiymətli kağızları artıq "S&P" agentliyindən çox aşağı reytinq alıb. Eyni zamanda "Honda" görünür, potensial birləşməyə marağını itirmir, lakin "Nissan"da rəhbərliyin dəyişdirilməsi kimi sərt şərt qoyur.

Xatırladaq ki, fevralın 13-də "Honda" və "Nissan" çoxsaylı fikir ayrılıqları səbəbindən birləşmə ideyasından imtina etdikləri məlum olub. Xüsusilə "Nissan"ın rəhbərliyi yeni alyans çərçivəsində "Honda"nın törəmə şirkətinə çevrilmək perspektivindən narazı qalıb.