Huşunu itirən azərbaycanlı avtobusun altında qaldı - Türkiyədəki faciənin ANBAAN GÖRÜNTÜLƏRİ

Türkiyənin İstanbul şəhərində azərbaycanlı piyadanın faciəli şəkildə həyatını itirməsi ilə nəticələnən bədbəxt hadisə baş verib.

Oxu.Az-ın məlumatına görə, bu barədə "Anadolu" agentliyi xəbər yayıb.

Hadisə Küçükçekmece rayonunda qeydə alınıb. Səki ilə hərəkət edən Azərbaycan vətəndaşının halı qəfil pisləşib və o, yola yıxılıb. Bu zaman hərəkətdə olan servis mikroavtobusu yıxılan şəxsin üzərindən keçib.

Hadisə yerinə çağırılan təcili tibbi yardım briqadası piyadanın həyatını itirdiyini müəyyənləşdirib. Sürücü ifadəsi alınmaq üçün polis bölməsinə aparılıb, meyit isə müvafiq ekspertiza üçün morqa təhvil verilib.

Hadisə anı ərazidəki obyektlərdən birinin təhlükəsizlik kamerası tərəfindən qeydə alınıb. Hazırda faktla bağlı araşdırma aparılır.

Huşunu itirən azərbaycanlı avtobusun altında qaldı - Türkiyədəki faciənin ANBAAN GÖRÜNTÜLƏRİ