İlon Mask Münhen konfransının rəhbərini ələ saldı: "Yazıqdır"

ABŞ-nin Dövlət İdarəetməsinin Səmərəliliyi Departamentinin (DOGE) rəhbəri İlon Mask Münhen Təhlükəsizlik Konfransının rəhbəri Kristof Hoysqenə istehza edib və onu "yazıq" adlandırıb.

Oxu.Az-ın xəbərinə görə, bu barədə o, "X" hesabında forumun bağlanış mərasiminin videosunu şərh edərkən yazıb.

Mask bağlanış mərasimində Hoysqenin transatlantik münasibətlərdəki parçalanmalardan danışarkən emosiyalarını saxlaya bilməməsini və çıxışını bitirə bilmədən gözyaşlarında boğulmasını şərh edib.

"Ciddi, o, yazıq adamdır", - deyə Mask paylaşımda qeyd edib.

Fevralın 16-da Kristof Hoysqen bildirib ki, ABŞ-nin vitse-prezidenti Cey Di Vensin Münhen konfransındakı çıxışı Avropa və ABŞ-nin artıq ortaq dəyərləri paylaşmadığını göstərir. Münhendəki hazırkı forum, onun təşkilatçısının sözlərinə görə, Avropa üçün kabusa çevrilib.

Xatırladaq ki, fevralın 14-də Münhen Təhlükəsizlik Konfransında Cey Di Vens senzuraya, o cümlədən sosial medianın bloklanmasına görə Avropa İttifaqını tənqid edib. Vens vurğulayıb ki, Avropa "ABŞ üçün yararsızdır", öz seçicilərindən qorxur və yaxın illərdə mühüm bir iş görmək üçün demokratik mandata ehtiyac duyur.