İlon Maskın qurumu amerikalıların maliyyə məlumatlarını əldə etmək istəyir

İlon Maskın rəhbəri olduğu ABŞ-nin Hökumət Səmərəliliyi Departamenti (DOGE) Daxili Gəlirlər Xidmətinin (IRS) məlumatlarına çıxış əldə etməyə çalışır.

Oxu.Az-ın məlumatına görə, bu barədə "The Washington Post" qəzeti mənbələrə istinadən xəbər yayıb.

Bildirilir ki, IRS Donald Tramp Administrasiyasının təzyiqi altındadır və şəxsiyyət nömrələri, bank məlumatları, o cümlədən əməliyyatlar və yığım sənədləri kimi həssas məlumatlara DOGE əməkdaşlarının geniş çıxışını təmin edəcək anlaşma memorandumunun imzalanması məsələsini nəzərdən keçirir.

DOGE-nin maliyyə statistikasına çıxış əldə etmək üçün sorğusu IRS-də ciddi narahatlıq doğurub. Məsələ burasındadır ki, İnteqrasiya edilmiş Məlumat Axtarış Sistemi (IDRS) vasitəsilə xidmət məlumatlarının əldə edilməsi qanunvericiliklə ciddi şəkildə məhdudlaşdırılıb. Məlumatları qanunsuz açıqlanan və ya sadəcə yoxlanılan vergi ödəyiciləri qanuna əsasən maddi kompensasiya almaq hüququna malikdirlər.