İranda kəskin su çatışmazlığı yaşanır - çaylar və su anbarları qurumuş vəziyyətdədir. Hökumət rəsmiləri vəziyyətin kritik həddə çatdığını etiraf edərək, hətta paytaxtın köçürülməsi kimi radikal addımları müzakirə edirlər.
Oxu.Az "BILD na russkom" "Telegram" kanalına istinadla məlumatına görə, bu barədə hökumətin mətbuat katibi Fatimə Mühacirani bəyan edib.
O, su çatışmazlığını "milli problem" adlandıraraq, bunun humanitar və iqtisadi fəlakətə çevrilə biləcəyini deyib.
"Tehranda vəziyyət tamamilə acınacaqlıdır. Hətta paytaxtı bir həftəliyinə bağlamağı nəzərdən keçirməyə məcburuq", - deyə Mühacirani vurğulayıb. O, qeyd edib ki, bu "bağlanma" dövründə dövlət qurumları, universitetlər və məktəblər fəaliyyətini dayandıra bilər.
Yerli mediada yayılan xəbərlərə görə, İran hökuməti problemi aradan qaldırmaq üçün qeyri-ənənəvi yolları müzakirə edir. Təkliflər arasında iş həftəsinin dörd günə endirilməsi və imkan daxilində məsafədən işləməyə keçid var. Bu addımlar həm suya, həm də elektrik enerjisinə qənaət etməyi hədəfləyir.
Hazırda böhran ölkənin, demək olar ki, bütün ərazisini əhatə edir. Ekspertlər bildirirlər ki, su anbarlarının 80 faizi ya tamamilə boşdur, ya da tükənmək üzrədir. Paytaxt Tehranı su ilə təmin edən Cacrud çayı isə hələ mart ayında quruma həddinə çatmışdı.
Növbəti iki ay ərzində normal su təchizatı mümkün olmayacaq. Yağışlar yalnız payızda su ehtiyatlarını bərpa edəcək.
Artıq keçən həftə Tehran və digər 50 şəhərdə hakimiyyət su təchizatını məhdudlaşdırıb - kəsinti müddəti ümumilikdə 12-48 saat təşkil edib. Nəticədə ölkə sakinlərinin çoxu su çatışmazlığı olmayan şimala, Xəzər dənizi istiqamətinə köçüb.
Vəziyyətin nə qədər ciddi olduğunu Prezident Məsud Pezeşkianın bəyanatı göstərir, o, hətta paytaxtın başqa şəhərə köçürülməsini istisna etməyib:
"Tehranda həqiqətən də artıq su yoxdur", - deyə o bildirib.
Ekspertlər böhranın səbəbləri kimi çoxillik quraqlıq və su təchizatı problemini nəzərə almayan hökumətin ekoloji siyasətini göstəriblər. Bildirilir ki, hökumət infrastruktura investisiya qoymaq əvəzinə, Yaxın Şərqdə terror təşkilatlarının yaradılmasına və silahlandırılmasına sərmayə yatırıb.
