Abşeron rayonu, Pirəkəşkül qəsəbəsində içməli su təchizatında problem yaranıb.
Bu barədə Oxu.Az-ın qaynar xəttinə (+994 55 224-12-12) müraciət daxil olub.
Sakinlərin sözlərinə görə, oktyabrın 23-dən bəri sözügedən ərazidə içməli su təchizatı dayandırılıb. Onlar bildiriblər ki, dəfələrlə aidiyyəti qurumlara müraciət etsələr də, problem həllini tapmayıb.
Məsələ ilə bağlı İri Şəhərlərin Su Təchizatından (İŞST) Oxu.Az-ın sorğusuna cavab olaraq bildirilib ki, sözügedən ünvanda magistral su xəttində baş verən qəza nəticəsində su təchizatında fasilə yaranıb.
"Əraziyə dərhal briqada cəlb edilib, şəbəkədə təmir və bərpa işləri aparılıb. Hazırda xəttin su ilə doldurulması prosesi icra edilir. Sabahdan suyun əvvəlki rejimlə verilməsi bərpa ediləcək", - deyə qurumdan məlumat verilib
