İranyönümlü silahlı birləşmələrin əksəriyyəti Suriyanın keçmiş dövlət başçısı Bəşər Əsədin qaçmasından sonra Suriyanı tərk edib.
Oxu.Az-ın verdiyi məlumata görə, bu barədə "The Wall Street Journal" xəbər verib.
Nəşr Qərb və ərəb ölkələrinin rəsmilərinə istinadla xəbər verib ki, Suriyada hakimiyyət müxalifətə keçdiyi vaxt Dəməşqdə minlərlə İran döyüşçüsü qalırdı, onların da əksəriyyəti ölkənin şərqində cəmləşmişdi.
"ABŞ, Avropa və ərəb rəsmilərinin sözlərinə görə, İran qüvvələrinin əksəriyyəti dekabrda Suriya prezidenti Bəşər Əsəd rejiminin süqutundan sonra Suriyadan çıxıb", - deyə mənbədən vurğulanıb.
Xatırladaq ki, dekabrın 8-də Suriyanın silahlı müxalif qruplaşmaları Dəməşqi nəzarətə götürüblər. Bundan sonra Suriyanın Baş naziri Məhəmməd Qazi əl-Cəlali hakimiyyəti sülh yolu ilə təhvil verməyə hazır olduğunu bəyan edib. Bir müddət sonra Bəşər Əsəd münaqişənin bir sıra iştirakçıları ilə danışıqlardan sonra Suriya prezidenti vəzifəsindən getmək qərarına gəlib və ölkəni tərk edib. O, ailəsi ilə Rusiyaya sığınıb. Respublikanın müvəqqəti Baş naziri Məhəmməd əl-Bəşir 2025-ci ilin martına qədər fəaliyyət göstərəcək müvəqqəti hökumətin formalaşdırıldığını elan edib.
