İranda ölüm hallarının təxminən üçdəbiri - yəni 120 minə yaxın insanın həyatını itirməsi - düzgün qidalanmama ilə bağlıdır.
"Azad İran" "Telegram" kanalı xəbər verir ki, bu barədə ölkənin Səhiyyə Nazirliyinin son məlumatında bildirilir.
Nazirliyin nümayəndəsi Əhməd İsmayılzadənin verdiyi açıqlamada qeyd olunur ki, ildə 400-420 min arası ölüm hadisəsinin əhəmiyyətli hissəsi qida çatışmazlığından qaynaqlanır.
İqtisadi böhranın dərinləşməsi fonunda İran əhalisinin geniş təbəqələri xüsusilə süd, ət, meyvə və tərəvəz kimi əsas ərzaq məhsullarının əldə olunmasında çətinlik çəkir. Məlumata görə, bu vəziyyət həm ictimai sağlamlıq, həm də ailə büdcəsi üçün ciddi təhdidə çevrilib.
Mütəxəssislər qeyd edirlər ki, insanlarda zəruri vitamin və mineralların çatışmazlığı, uşaqlar və hamilə qadınlar arasında piylənmənin artması, ümumi sağlamlıq göstəricilərini ciddi şəkildə pisləşdirir və gələcək nəsillər üçün təhlükəli nəticələr doğura bilər.
