İspaniyanın hüquq-mühafizə orqanları müəyyən edib ki, iyulun sonunda kütləvi axın zamanı İspaniyanın muxtar şəhəri olan Seutaya daxil olan onlarla qeyri-qanuni miqrant krallığın materik hissəsinə keçməyi bacarıb.
Oxu.Az xəbər verir ki, bu barədə mənbələrə istinadən ABC qəzeti məlumat yayıb.
Polisin məlumatına görə, cinayətkar şəbəkələr bu böhrandan istifadə edərək insanların Cəbəllüttariq boğazından Əndəlüs sahillərinə qeyri-qanuni daşınmasını təşkil ediblər. Qaçaqmalçılar daşınma üçün qayıqlardan və hidrosikllərdən istifadə ediblər. Bildirilir ki, miqrantlar əsasən Kadis əyalətinin sahillərinə çıxıblar.
İyul ayının sonunda on minlərlə qeyri-qanuni miqrant şəhəri Mərakeşdən ayıran dalğaqıranı keçərək həm üzərək, həm də piyada şəkildə Seutaya çata bilmişdi. Yaranmış böhran fonunda Madrid yaşayış məntəqəsində təhlükəsizliyin təmin olunmasına kömək etmək məqsədilə hərbçiləri cəlb etmək qərarına gəlib. Qeyri-qanuni miqrantların böyük əksəriyyətinin artıq Mərakeşə qayıtdığı ehtimal edilsə də, İspaniya rəsmilərinin məlumatına əsasən, şəhərdə hələ də 5 minə yaxın miqrantın qaldığı düşünülür.
Qeyd edək ki, İspaniyanın xarici işlər naziri Xose Manuel Albares daha əvvəl qeyri-qanuni miqrantların nə İspaniyanın materik hissəsinə, nə də digər Avropa İttifaqı ölkələrinə daxil ola bilməyəcəklərini bəyan etmişdi.
