İsrail Hərbi Prokurorluğu Yehudadan olan İsrail Müdafiə Qüvvələrinin (İDF-SAXAL) hərbçisini xarici agentlə əlaqə saxlamaqda və düşmənə məlumat ötürməkdə ittiham edib.
Oxu.Az-ın xəbərinə görə, bu barədə "Vesty.co.il" nəşri məlumat verib.
Bildirilib ki, hərbçi "Şin-Bet" daxili kəşfiyyat xidməti və Hərbi Polis tərəfindən saxlanılıb.
İstintaq müəyyən edib ki, o, pul mükafatı müqabilində məxfi olmayan məlumatları İranın kəşfiyyat xidmətlərinə ötürüb. İttiham aktında bildirilib ki, hərbçi şüurlu şəkildə iranlı əməliyyatçılarla əlaqə saxlayıb və onlar üçün tapşırıqlar yerinə yetirib, o cümlədən raketlərin qarşısının alınması ilə bağlı videoyazılarını ötürüb və İsraildə raketlərin düşdüyü və vurduğu yerləri lentə alıb.
Qeyd edilir ki, məlumat ona xidməti vəzifələrini icra edərkən daxil olmayıb. Hərbi məhkəmə təqsirləndirilən şəxsin nəzarət altında saxlanılma müddətinin iyulun 22-dək uzadılması barədə qərar qəbul edib.
