İtaliyada böyük əməliyyat: Yüzə yaxın mafioz həbs edildi

İtaliya polisi Kalabriya mafiyasına - "Ndranqeta"ya qarşı böyük əməliyyat keçirib. Əməliyyat çərçivəsində 14 əyalətdə mafiyanın klanlarına qarışmaqda və ya onlarla əməkdaşlıqda ittiham olunan 97 nəfər həbs edilib.

Oxu.Az-ın xəbərinə görə, bu barədə "EFE" agentliyi Redjo-di-Kalabriyanın karabinerlərinə (hərbi polis) istinadən məlumat verib.

Bildirilib ki, "Millenium" kod adlı əməliyyat zamanı həbs olunanlar mafioz təşkilatda iştirakda, narkotiklərin qanunsuz dövriyyəsində, adam oğurluğunda, siyasətçilərə təsir göstərməkdə və qanunsuz silah saxlanılmasında ittiham olunurlar.

Bundan əlavə, çirkli pulların yuyulması və cinayət əməllərinə logistik dəstək verilməsi üçün istifadə olunduğu güman edilən iki şirkətin fəaliyyəti ilə bağlı da araşdırmalara başlanılıb.