Planetin ən çox axtarılan "Xalisko Yeni Nəsil" narkokartelinin "El Menço" ləqəbli liderinin məhv edilməsi xəbəri dünya gündəmini zəbt edib. Hərbi əməliyyatlarla zərərsizləşdirilən narkobaron, əslində, kimdir? Necə oldu ki, keçmiş bələdiyyə polisi olan El Menço Pablo Eskobar və "El Çapo" Quzman ilə müqayisəolunan bir narkotik baronuna çevrildi?
Oxu.Az-ın xəbərinə görə, "Hürriyet" nəşri narkobaron haqqında maraqlı faktları dərc edib.
Qeyd olunub ki, əsl adı Nemesio Ruben Osequera Servantes olan "El Menço" 1966-cı ildə Miçoakan ştatının Akvililya şəhərində anadan olub. Fəaliyyətinə narkotikin qanunsuz becərilməsi ilə başlayan Osequeranın kriminal karyerası ABŞ-yə mühacirət etdikdən sonra başlayıb. Ancaq ABŞ-də törətdiyi cinayətlərə görə bir neçə dəfə həbs edildikdən sonra o, yenidən Meksikaya deportasiya edilib.
Məqalədə bildirilir ki, vətəninə qayıdandan sonra Osequera bələdiyyə polisi vəzifəsində çalışıb. Lakin çox keçmədən mütəşəkkil cinayətkar qruplaşmalara qoşulub. Əvvəlcə "Milenio" karteli daxilində fəaliyyət göstərsə də, 2010-cu ildə "Xalisko Yeni Nəsil” kartelini qurub. Onun rəhbərliyi altında "Xalisko Yeni Nəsil" qrupu sintetik narkotik ticarətində ixtisaslaşaraq ABŞ-də ən böyük fentanil təchizatçısına çevrilib.
"Xalisko Yeni Nəsil" təşkilatı ABŞ tərəfindən "xarici terror təşkilatı" kimi tanınıb. Bundan başqa, ABŞ-nin Narkotiklərlə Mübarizə İdarəsinin rəsmiləri "El Menço"nun təhlükə səviyyəsini Pablo Eskobarla müqayisə edərək, onun tutulmasına görə 15 milyon dollar mükafat təklif edib.
Məlumata görə, kartel lideri Nemesio Osequera təkcə 15 ildə Meksikanın 25-dən çox əyalətində, dünyanın isə 40-dan çox ölkəsində aktiv qrupları olan cinayətkar imperiya qurub.
