Dünyanın ən güclü narkobaronlarından olan, "Xalisko Yeni Nəsil" kartelinin "El Menço" ləqəbli liderinin zərərsizləşdirilməsindən sonra Meksikanın səkkiz ştatında talanlar başlayıb.
Oxu.Az-ın "Milenio" qəzetinə istinadən verdiyi xəbərə görə, Meksika və ABŞ təhlükəsizlik qüvvələri tərəfindən helikopterlərin iştirakı ilə xüsusi əməliyyat keçirilib və bundan sonra şiddətli atışma başlayıb.
Meksika Müdafiə Nazirliyi "El Menço"nun təcili yardım helikopteri ilə nazirliyin xəstəxanasına aparılarkən yolda öldüyünü dəqiqləşdirib. Liderlərinin ölüm xəbərindən dərhal sonra kartel üzvləri müharibə elan edib və mülki şəxsləri öldürməyə and içiblər.
Kartel üzvləri Milli Qvardiyanın bazasına hücum ediblər, səkkiz ştatda toqquşmalar başlayıb.
Meksikanın ən böyük narkokartellərindən biri olan "Xalisko Yeni Nəsil" kartelinin lideri "El Menço" ləqəbli Nemesio Osegera Servantes ordunun xüsusi əməliyyatı zamanı öldürülüb.
Oxu.Az-ın TASS-a istinadən verdiyi xəbərə görə, bu barədə "Milenio" qəzeti hökumət mənbələrinə istinadən məlumat yayıb.
Nəşrin məlumatına görə, cinayətkar qrupun lideri fevralın 22-də Talpa-de-Alyende bələdiyyəsində (Xalisko ştatı) hərbi əməliyyat nəticəsində zərərsizləşdirilib. Еəhlükəsizlik qüvvələrinin hərəkətlərinə cavab olaraq kartel üzvləri Xalisko, Miçoakan, Kolima, Tamaulipas, Quanaxuato və Aquaskalyentes ştatlarında magistral yolları bağlamağa, maşınları və tikililəri yandırmağa başlayıblar.
Qeyd edək ki, "El Çapo" ləqəbli Xoakin Qusmanın həbsindən sonra Servantes ölkənin ən güclü narkobaronu hesab olunurdu. Onun üzvü olduğu qruplaşma narkotik ticarətinin əhəmiyyətli bir hissəsinə nəzarət edir və Meksikanın bir çox ştatında fəaliyyət göstərir.
