"Ehtimal ki, ABŞ Prezidenti Donald Tramp İranla nüvə proqramı üzrə sazişin bağlanmasına nail olmaq üçün güzəştlərə getməyə hazırdır".
Oxu.Az-ın verdiyi məlumata görə, bu barədə "Axios" portalı mənbələrə istinadən məlumat verib.
Bildirilir ki, Maskatda (Oman) dolayı danışıqların müsbət nəticələnməsi halında, Trampın xüsusi nümayəndəsi Stiven Uitkoff ilə İran xarici işlər naziri Abbas Əraqçı arasında birbaşa dialoq 12 aprel və ya 13 apreldən sonra baş tuta bilər.
Xatırladaq ki, aprelin 12-də Maskatda Omanın vasitəçiliyi ilə Abbas Əraqçı və Stiven Uitkoffun rəhbərlik etdiyi İran və ABŞ nümayəndə heyətləri arasında danışıqların ilk raundu keçirilir. Görüşdən əvvəl Əraqçı qeyd edib ki, məsləhətləşmələr yalnız nüvə dosyesini əhatə edəcək, digər məsələləri isə tərəflər danışıqlar irəlilədikcə müzakirə etməyə başlayacaqlar.
