KİV: Trampın yaxın ətrafı onun Putinə zəng etməyinin əleyhinədir

ABŞ Prezidenti Donald Trampın yaxın ətrafı ona Ukraynada tam atəşkəs razılaşması əldə olunana qədər rusiyalı həmkarı Vladimir Putinlə yeni müzakirələr aparmamağı tövsiyə edib.

Oxu.Az xəbər verir ki, bu barədə "NBC News" kanalı məlumat verib.

Məlumatda, həmçinin qeyd olunub ki, Donald Trampla Rusiya prezidenti arasında yeni telefon danışığı planlaşdırılmayıb.

Yayılan məlumatlara Kremldən də cavab gəlib. Qeyd olunub ki, Rusiya prezidentinin cədvəlində hələ ABŞ-li həmkarı ilə telefon danışığı yoxdur, lakin lazım gələrsə, bu barədə sürətli razılıq əldə etmək olar.

"Rusiya lideri bu cür ünsiyyətə açıqdır", - deyə Rusiya prezidentinin mətbuat katibi Dmitri Peskov vurğulayıb.

Qeyd edək ki, iki lider arasında son telefon danışığı martın 18-də baş tutub.