Kolumbiya hərbçiləri Venesuela sərhədi yaxınlığında bombardman həyata keçiriblər.
Oxu.Az bu barədə "Agence France-Presse" agentliyinə istinadən xəbər verir.
Kolumbiya Müdafiə Nazirliyindən adı çəkilməyən mənbə agentliyə bildirib ki, doqquz üsyançı (narkotik alveri ilə məşğul olan qruplaşma - red.) həlak olub. O, həlak olanların dəqiq hansı qruplaşmaya aid olduğunu açıqlamayıb.
Agentliyin məlumatına görə, hərbi əməliyyat Kolumbiya Prezidenti Qustavo Petronun Arakua departamentində narkotacirlərə qarşı mübarizəsi çərçivəsində həyata keçirilib.
Agentlik xatırladır ki, bu həftə Kolumbiya hərbçiləri Amazon regionunda hava zərbələri endiriblər. Nəticədə Kolumbiya İnqilabçı Silahlı Qüvvələrindən (FARK) ayrılan dissident qruplaşmasının 19 üzvü həlak olub.
