Krasnoyarskda narkoticarət təşkil edən azərbaycanlı Rusiyada hakim qarşısına çıxarılacaq.
Oxu.Az xəbər verir ki, bu barədə Tıva Respublikası Daxili İşlər Nazirliyi məlumat yayıb.
Məlumata görə, 58 yaşlı azərbaycanlı narkotik vasitələrin qanunsuz dövriyyəsi ilə məşğul olmaqda ittiham olunur. O, 2020-ci ildə Tıvadan Krasnoyarska həşişin tədarükü və satışı məqsədilə cinayətkar qrup yaradıb. Həmin ilin sentyabrında qrup ifşa edilsə də, lider Azərbaycana qaçaraq gizlənib və beynəlxalq axtarışa verilib.
Beş il sonra Tıva polisi və Azərbaycan Daxili İşlər Nazirliyinin əməkdaşlarının birgə əməliyyatı ilə şübhəli şəxs Bakı aeroportunda saxlanılıb. O, Rusiyaya ekstradisiya olunaraq Tıvanın 1 saylı istintaq təcridxanasına yerləşdirilib. Onun barəsində hələ beş il əvvəl qiyabi həbs qətimkan tədbiri seçilmişdi.
Cinayət işi - "iri həcmdə narkotik vasitələrin satışına təşkilatlanmış qrup tərəfindən cəhd" maddəsi üzrə baxılması üçün Piy-Xem Rayon Məhkəməsinə göndərilib. Qrupun digər üç üzvü artıq məhkum olunub.
