"Ukraynaya veriləcək istənilən təhlükəsizlik zəmanətinin əsasında NATO Nizamnaməsinin 5-ci maddəsi dayanmalıdır. Bu maddə münaqişə zamanı alyans üzvlərinin kollektiv müdafiəsini nəzərdə tutur".
Oxu.Az "İnterfaks"a istinadən xəbər verir ki, bunu ABŞ prezidentinin xüsusi nümayəndəsi Cared Kuşner "Könüllülər koalisiyası"nın görüşündən sonra keçirilən mətbuat konfransında bildirib.
"Bu, əldə etdiyimiz çox mühüm nəticədir. Düşünürəm ki, Rusiyaya istənilən təhlükəsizlik zəmanətinin NATO Nizamnaməsinin 5-ci maddəsinə əsaslanacağı konsepsiyasını çatdırdıq", - deyə o bildirib.
Kuşner Rusiyada bu konsepsiya ilə bağlı çoxlu şübhələrin olduğunu etiraf edib. Onun sözlərinə görə, məhz buna görə Rusiya ilə Avropa arasında dialoqun bərpası vacibdir.
O qeyd edib ki, təhlükəsizlik sistemi üzərində iş aparılır. Bu sistem çərçivəsində vəziyyətə nəzarət mexanizmləri gücləndiriləcək, ciddi çəkindirmə tədbirləri tətbiq olunacaq və əldə edilmiş razılaşmaların pozulmasına görə ciddi nəticələr nəzərdə tutulacaq.
Kuşner əlavə edib ki, NATO Nizamnaməsinin 5-ci maddəsinə əsaslanan zəmanətlər daha geniş təhlükəsizlik tədbirləri paketinin tərkib hissəsi olacaq.