Los-Ancelesdə anbarda baş verən böyük yanğınla əlaqədar hakimiyyət orqanları yerli sakinləri təhlükəsiz yerlərə sığınmağa çağırıb.
Oxu.Az xəbər verir ki, bu barədə "ABC" teleradio şirkəti şəhər administrasiyasına istinadən məlumat verib.
Məlumatda deyilir ki, çərşənbə günü günorta vaxtı Los-Ancelesin Boyl-Hayts bölgəsində yerləşən ticarət obyektində genişmiqyaslı yanğın qeydə alınıb və alov günəş panellərinə də keçib. Səmaya qalxan qatı qara tüstü sütunu bir neçə kilometr məsafədən müşahidə olunub.
Şəhər hakimiyyəti bu ərazidə yaşayan hər kəsdən dərhal qapalı məkanlara daxil olmağı və bütün pəncərə və qapıları bağlamağı xahiş edib.
Alovun qarşısının alınması üçün əraziyə iki helikopterin cəlb edildiyi vurğulanır. Los-Ancelesin polis idarəsi xüsusi həyəcan vəziyyətinə gətirilib. ABC-nin yaydığı məlumata əsasən, hadisə nəticəsində zərərçəkənlər barədə hələlik heç bir informasiya daxil olmayıb.
