Fransada Luvr muzeyindən oğurluq etməkdə şübhəli bilinənlərdən biri ona 15 min avro təklif edildiyini bildirib.
Oxu.Az xəbər verir ki, bu barədə "Le Parisien" nəşri məlumat yayıb.
Şübhəli şəxsin sözlərinə görə, oğurluqdan bir neçə gün əvvəl onunla "slavyan ləhcəsi ilə danışan" iki nəfər əlaqə saxlayıb.
İddia edilir ki, onlar saxlanılan şəxsə 15 min avro müqabilində oğurluq etməyi təklif ediblər. Saxlanılan şəxsin dediyinə görə, Fransanın ən məşhur muzeyini qarət etdiyindən xəbərsiz olub və "bazar günü açıq olan hansısa binaya" girdiyini düşünüb.
Oğurluğu araşdıran Fransa hüquq-mühafizə orqanları qarətin sifarişçilərinin əcnəbi şəxslər olacağını istisna etmirlər. Hadisə ilə bağlı digər versiyalara sənət kolleksiyaçıları və ya sırf eqoist motivlər güdən mütəşəkkil cinayətkar qruplar daxildir.
Fransa polisinin məlumatına görə, həbs edilən 4 nəfərin hamısı oğurluqda birbaşa iştirak edib. Bildirilir ki, saxlanılanlar təcrübəli oğru deyillər və cinayət qruplaşmalarının yüksək eşelonları ilə heç bir əlaqələri yoxdur.
Saxlanılanlardan ikisi günahlarını etiraf edib, biri isə təqsirini boynuna almayıb. Muzeydən oğurluq etməkdə təqsirləndirilən sonuncu şəxs Paris polisi tərəfindən dindirilir.
Noyabrın 25-də "Le Parisien" qəzeti muzeyin qarətində bilavasitə iştirak edən dördüncü şübhəlinin həbsi barədə məlumat yayıb. Daha sonra "Le Figaro" Paris prokurorluğuna istinadən xəbər verib ki, Fransa polisi bu işlə bağlı daha üç şübhəli şəxsi saxlayıb. Bunların bir kişi və iki qadın olduğu vurğulanır.
Xatırladaq ki, keçən ay bir neçə nəfər muzeyin pəncərələrini sındıraraq zərgərlik və zinət əşyalarını oğurlayıblar. Hadisə ilə bağlı araşdırmalar davam edir, lakin oğurlanmış əşyalar hələ də tapılmayıb.
