Fransanın paytaxtı Parisdə ötən il Luvr muzeyindən zinət əşyalarının oğurlanmasında şübhəli bilinən iki nəfər cinayətin naməlum sifarişçinin göstərişi ilə törədildiyini iddia edib.
Oxu.Az "Le Monde" nəşrinə istinadən xəbər verir ki, 40 yaşlı taksi sürücüsü Abdulay N. və 36 yaşlı işsiz Əlcəzair vətəndaşı Gelamalla A. ötən ilin oktyabrında muzeyin Apollon qalereyasına daxil olublar.
Onlar Fransa taxt-tacına məxsus zinət əşyalarının bir hissəsini oğurlayıblar. Qaldırıcı platforma vasitəsilə muzeyin eyvanına qalxıb, vitrinlərdəki zinət əşyalarını götürərək skuterlərlə hadisə yerindən qaçıblar. Onlar qarətdən bir həftə sonra saxlanılıb, mütəşəkkil dəstənin tərkibində oğurluqda ittiham olunaraq həbs ediliblər.
İyun ayında şübhəlilər növbəti dindirilmə üçün müstəntiqlərin yanına gətiriliblər. Bundan əvvəl onlar cinayətin təfərrüatını açıqlamamışdılar.
Onların sözlərinə görə, hərəkətlərini insidentdən bir neçə gün əvvəl onları işə götürən naməlum sifarişçi idarə edib. Abdulay N. ağır maliyyə vəziyyətinə görə bu işə razılaşıb. Naməlum şəxs miqranta 15-20 min avro vəd edib. Kişi, həmçinin Luvrun qarət ediləcəyini bildiyini etiraf edib. Onun şəriki Gelamalla A. isə guya zərgərlik mağazasını qarət etdiyini düşündüyünü deyib.
"Bunu bilsəydim, heç vaxt oraya getməzdim", - deyə o bildirib və 20-25 min avro aldığını söyləyib.
Qeyd edək ki, qarət ötən il oktyabrın 19-da baş verib. Həmin gün saxlanılan iki nəfər təlimat alaraq iki naməlum şəxslə görüşüb. Daha sonra birlikdə Luvra yollanıblar. Hadisə yerinə çatdıqdan sonra onlar sarı təhlükəsizlik jiletləri geyinərək qaldırıcı platforma ilə eyvana qalxıblar. Kişilər içəri daxil olduqdan sonra vitrinləri bucaqyonan alətlə kəsməyə başlayıblar. Nəticədə Fransa kraliçaları və imperatriçalarına məxsus, ümumi dəyəri 88 milyon avro olan səkkiz zinət əşyasını oğurlayıblar.
