Yevgeni Xmara Ukrayna Təhlükəsizlik Xidmətinin (SBU) rəhbəri vəzifəsini müvəqqəti icra edəcək.
Oxu.Az xəbər verir ki, bu barədə Ukrayna Prezidenti Volodimir Zelenskinin müşaviri Dmitri Litvin bildirib.
Öz növbəsində, Vasili Malyuk SBU-nun rəhbəri vəzifəsindən istefa verdiyini bəyan edib.
O sözügedən quruma 2022-ci ilin iyul ayından rəhbərlik edirdi.
"Mən Təhlükəsizlik Xidmətinin rəhbəri vəzifəsindən istefa verirəm. Düşmənə maksimum zərər vurmağa davam edəcək dünyasəviyyəli asimmetrik xüsusi əməliyyatlar həyata keçirmək üçün SBU sistemində qalacağam. Əminəm ki, güclü və müasir kəşfiyyat xidməti dövlətimizin təhlükəsizliyinin açarıdır. Ukrayna prezidentinin müdafiə sektorunda həyata keçirdiyi dəyişikliklər buna nail olmağa yönəlib və mən ona təşəkkür edirəm", - deyə Malyuk bildirib.
Ukrayna Təhlükəsizlik Xidmətinin hazırkı rəhbəri Vasili Malyuk prezidentin birbaşa göstərişi ilə istefa verib.
Oxu.Az xəbər verir ki, bu barədə Ali Radanın deputatı Aleksiy Qonçarenko "Telegram"da bildirib.
Bu xəbər Dövlət Sərhəd Xidmətinin rəisi Sergey Deynekonun vəzifəsindən azad edilməsi ilə eyni vaxta təsadüf edib.
A.Qonçarenko bəyan edib ki, Vasili Malyuk Prezident Volodimir Zelenskinin tələbi ilə vəzifəsindən istefa verib.
Hələlik yeni rəhbərin təyin edilməsi ilə bağlı rəsmi fərman yoxdur, lakin ekspertlər və siyasətçilər artıq Yevgeni Xmaranın namizədliyini müzakirə edirlər. O hazırda Ukrayna Təhlükəsizlik Xidmətinin "A" Xüsusi Əməliyyat Mərkəzinə rəhbərlik edir və xidmət rəisinin səlahiyyətlərini icra etmək üçün ən optimal namizəd hesab olunur. Hökumətdəki islahatlar fonunda V.Malyukun istefasının səbəbləri rəsmi şəkildə şərh edilməyib.
