Amerikalı sahibkar İlon Mask ABŞ Prezidenti Donald Tramp ilə təklikdə danışıb.
Oxu.Az "The New York Times" nəşrinə istinadla xəbər verir.
Bildirilir ki, baş-başa danışıq Maskın Trampın ünvanına hücumlardan təəssüfləndiyini sosial şəbəkə hesabında yazmasından əvvəl olub.
Nəşrin mənbələrə istinadən yazdığına görə, bazar ertəsi gecə saatlarında Mask prezidentə zəng edib, çərşənbə günü isə sahibkar Trampla qarşıdurmaya görə təəssüfləndiyini bildirib.
Bununla belə, tərəflərin əvvəlki münasibətlərini bərpa etməyə nail olub-olmaması sual altındadır.
ABŞ Prezidenti Donald Tramp daha əvvəl onunla mübahisə etmiş iş adamı İlon Maskın üzr istəməsini "çox xoş hal" adlandırıb.
Oxu.Az xəbər verir ki, bunu Ağ Evin rəhbəri "The New York Post" nəşri ilə söhbət zamanı deyib.
Bununla belə, o, Maskla arasında baş verənləri keçmişdə qoymağa hazır olub-olmaması barədə sualı cavablandırmayıb.
Qeyd edək ki, milyarder Mask daha əvvəl sosial şəbəkə hesabında Trampla bağlı bəzi paylaşımlarına görə təəssüfləndiyini bildirmişdi.
Bu yaxınlarda amerikalı milyarder İlon Maskla barışmağın mümkünsüzlüyündən danışan ABŞ Prezidenti Donald Tramp fikrini dəyişib.
Oxu.Az xəbər verir ki, mübahisədən bir neçə gün sonra Ağ Ev rəhbəri "New York Post"un "Pod Force One" podkastının efirində sahibkarla münasibətlərin yaxşılaşa biləcəyini istisna etməyib.
Tramp bildirib ki, o, keçmiş milyarder dostu ilə barışa bilər, lakin bu, hazırda onun üçün prioritet deyil. ABŞ lideri qeyd edib ki, o, onların mübahisəsində Maskı günahlandırmır, lakin onun hərəkətlərindən bir az məyus olub.
"Baxın, mən ona qarşı kin saxlamıram. Bunun baş verməsi məni çox təəccübləndirdi", - ABŞ prezidenti vurğulayıb.
Amerikalı sahibkar və milyarder İlon Mask ABŞ Prezidenti Donald Trampdan sosial şəbəkədəki son açıqlamalarına görə açıq şəkildə üzr istəyib və şərhlərinin həddi aşdığını etiraf edib.
Oxu.Az xəbər verir ki, bu barədə iş adamı sahibi olduğu "X" sosial şəbəkəsindəki hesabında müvafiq açıqlama paylaşıb.
"Keçən həftə Prezident Tramp haqqında yazdığım bəzi yazılara görə təəssüflənirəm. Bu, artıq idi", - Mask yazıb.
Qeyd edək ki, iyunun 5-də Mask və Tramp arasında qızğın ictimai qarşıdurma baş verib. Bu münaqişə zamanı Mask bir sıra təxribat xarakterli bəyanatlar verib, o cümlədən bildirib ki, onun dəstəyi olmasaydı, Tramp 2024-cü ilin noyabrında keçirilən prezident seçkisində qalib gələ bilməyəcəkdi. Bundan əlavə, o, hazırkı prezidentin impiçmenti ideyasını dəstəkləyib və Ağ Evin iqtisadi siyasətini sərt şəkildə tənqid edib.
