Sərvəti 159.6 milyard dollar dəyərində qiymətləndirilən məşhur amerikalı investor Uorren Baffet yaşlanma haqqında düşüncələrini bölüşüb.
Oxu.Az-ın verdiyi məlumata görə, 94 yaşlı milyarder bu barədə "The Wall Street Journal" (WSJ) nəşrinə danışıb.
Onun sözlərinə görə, yaşlanmanın ilk əlamətlərini o, 90 yaşından sonra hiss etməyə başlayıb. Belə ki, o, vaxtaşırı tarazlığı itirməyə və ünsiyyətdə olduğu insanların adlarını xatırlamaqda çətinlik çəkməyə başlayıb.
"Berkshire Hathaway"in sahibi qeyd edib ki, yaşlandıqca özü ilə 62 yaşlı varisi Qreq Abel arasında iş qabiliyyətindəki fərqi daha çox hiss etməyə başlayıb.
"Onun 10 saatlıq iş günündə gördüyü işlə mənim eyni müddətdə gördüyüm iş arasındakı fərq həm enerji səviyyəsinə, həm də məhsuldarlığa görə getdikcə daha çox nəzərə çarpır", - deyə Baffet vurğulayıb.
Qeyd edək ki, mayın 3-də Baffet "Berkshire Hathaway" konqlomeratının baş direktoru vəzifəsindən gedəcəyini elan edib və Abeli öz varisi kimi təqdim edib. Qismən işdən uzaqlaşmasına baxmayaraq, Baffet şirkətin direktorlar şurasının sədri olaraq qalacaq.
