Milan şəhərinin meri Cüzeppe Sala modelyer Corcio Armaninin dəfn olunacağı günü matəm günü elan edib.
Oxu.Az bu barədə ANSA agentliyinə istinadla xəbər verir.
"Milan italyan modasını və şəhərimizi dünyada təcəssüm etdirən Armani üçün dəfn günü matəm elan edəcək", - deyə mer bildirib.
Daha əvvəl bəyan edilmişdi ki, dəfn mərasimi sentyabrın 8-də keçiriləcək və özəl xarakter daşıyacaq. Modelyerlə vida mərasimi isə sentyabrın 6 və 7-də "Armani" şirkətinin Milandakı mənzil-qərargahında təşkil olunacaq.
91 yaşında dünyasını dəyişən italyan modelyer Corcio Armaninin dəfn mərasimi qapalı formatda keçiriləcək.
Oxu.Az xəbər verir ki, bu barədə "Armani Group" şirkətinin rəsmi bəyanatında məlumat verilib.
Bəyanata görə, əfsanəvi modelyerlə vida mərasimi Milanda, Armani/Teatro Moda Evi sərgi mərkəzinin ərazisində baş tutacaq. "Armani Group" mərasimi ailənin və brendin yaradıcısının öz istəyinə uyğun təşkil edir.
Qeyd olunur ki, bu ilin iyun ayında modelyer sətəlcəm xəstəliyindən əziyyət çəkib.
Məşhur italiyalı modelyer-dizayner Corcio Armani vəfat edib.
Oxu.Az bu barədə "La Repubblica" nəşrinə istinadən məlumat verir.
Onun işçilərinin bildirdiyinə görə, 91 yaşlı dizayner son günlərinə qədər çalışıb, özünü şirkətə, onun kolleksiyalarına, müxtəlif və daim dəyişən layihələrinə həsr edib.
Son vaxtlarda "italyan modasının kralı"nın səhhətinin pisləşməsi barədə məlumatlar yayılmışdı.
Onun 1975-ci ildə təsis etdiyi moda evi böyük holdinqlərə daxil olmayan az sayda şirkətlərdən biri olaraq qalırdı.
