Məşhur rusiyalı bəstəkar, SSRİ xalq artisti Rodion Şedrin Almaniyada 93 yaşında vəfat edib.
Oxu.Az-ın xəbərinə görə, bu barədə Mariinski Teatrı "VKontakte" səhifəsində məlumat verib.
"Ötən gecə, 93 yaşında zəmanəmizin ən böyük dahisi, dünya klassiki Rodion Konstantinoviç Şedrin vəfat etdi", - deyə məlumatda bildirilib.
Şedrin 20-ci əsrin ikinci yarısının ən məşhur bəstəkarlarından biridir, əsərlərinin əksəriyyəti klassiklərin - Nikolay Qoqol, Anton Çexov, Lev Tolstoy, Vladimir Nabokov, Nikolay Leskov və başqalarının süjetləri üzərində yazılıb. O, Böyük Teatrda premyeraları keçirilmiş "Balaca donqarlı at", "Karmen süitası", "Anna Karenina", "Qağayı", "İtlə xanım" baletlərinin, həmçinin "Lolita", "Sehrlənmiş səyahətçi", "Boyarınya Morozova", "Solaxay", "Milad nağılı" operalarının müəllifidir.
O, ümumilikdə yüzdən çox kamera, xor və simfonik əsərlər, dramatik tamaşalar və filmlər üçün musiqilər yaradıb.
Rodion Şedrin, həmçinin 2015-ci ildə 89 yaşında vəfat edən rusiyalı balerina Maya Plisetskaya ilə evli olub.
Balerinanın əri ilə birgə hazırladığı vəsiyyətinə uyğun olaraq, Maya Plisetskayanın külü Rodion Şedrinin külü ilə birlikdə Rusiya üzərinə səpələnəcək.
Vəsiyyətnamənin özü 2015-ci ildə o vaxt Böyük Teatrın baş direktoru vəzifəsində olan Vladimir Urin tərəfindən ictimaiyyətə açıqlanıb. Urini sənəd barədə bəstəkar özü məlumatlandırıb.
"Ölümdən sonra cəsədlərimiz kremasiya olunmalıdır (yandırılmalıdır) və daha uzun ömür sürən birimiz üçün kədərli gediş saatı gələndə və ya eyni vaxtda öləcəyimiz təqdirdə, hər ikimizin külü birləşdirilərək Rusiyanın üzərinə səpələnməlidir", - deyə vəsiyyətnamədə bildirilib.
1955-ci ildə tanış olan Rodion Şedrin və Maya Plisetskaya 1958-ci ildə evləniblər. Şedrin bir sıra əsərlərini, o cümlədən "Donqarlı balaca at" baletinin partiturasını həyat yoldaşına həsr edib. Onlar "Anna Karenina", "Qağayı", "İtlə xanım", "Karmen süitası" kimi baletlər üzərində birlikdə çalışıblar. Plisetskaya 2015-ci il mayın 2-də vəfat edib.
