"Miss Supranational Brazil" müsabiqəsinin qalibi və "Miss Supranational-2026" yarışmasının üçüncüsü Lara Marina titulundan məhrum edilib.
Oxu.Az bu barədə "Metropoles"ə istinadən xəbər verir.
20 yaşlı modelin sözlərinə görə, onun titulunun əlindən alınmasına hamilə olduğunun aşkarlanması səbəb olub. Lara Marina bildirib ki, hamilə olduğunu müsabiqədə iştirak etdikdən sonra öyrənib.
Müsabiqənin təşkilat komitəsi isə modelin tituldan məhrum edilməsi qərarının tədbirin qaydaları və onunla imzalanmış müqavilənin şərtlərinin daxili təhlilinin nəticəsi olduğunu açıqlayıb.
"Qərar titulun qorunması ilə uyğun gəlməyən müqavilə öhdəliklərinin yerinə yetirilməməsi ilə bağlıdır. Qərar müsabiqənin keçirilməsi qaydalarına və qüvvədə olan hüquqi normalara ciddi şəkildə uyğun olaraq qəbul edilib", - təşkilat komitəsindən bildirilib.
Nəşrin məlumatına görə, 2026-cı ildə müsabiqədə subay anaların və boşanmış modellərin iştirakına icazə verilib. Eyni zamanda, evli qadınların yarışmada iştirakına qadağa qoyulub.
