Moskvada narkotik kuryeri robot-it cinayət üstündə yaxalandı

Rusiya paytaxtında maraqlı hadisə baş verib - polis narkotik maddələr daşıyan robot-iti saxlayıb.

Oxu.Az-ın verdiyi məlumata görə, bu barədə "ÇP/Moskva" "Telegram" kanalı xəbər verib.

Bildirilib ki, qeyri-adi kuryer yerli sakinlərin diqqətini cəlb edib; onlar bir neçə gün ərzində robot-itin rayonda hərəkətlərini müşahidə ediblər. Sonda şübhəli vəziyyət vətəndaşları hüquq-mühafizə orqanının əməkdaşlarını çağırmağa məcbur edib.

Hadisə yerinə gələn polis əməkdaşları yoxlama üçün robot-iti saxlayıblar. Robotun üzərində narkotik maddələr olan bağlamalar aşkar edilib. Maraqlıdır ki, elektron heyvanın üzərində qadağan olunmuş maddələr satan internet mağazasının açıq reklamı olub.

Yoxlama cəhdi zamanı robot "müdafiə rejimi"nə keçib.

Hadisə ilə bağlı polis təhqiqatlara başlayıb.