Moskvanın Meşşanski Rayon Məhkəməsi milyarder Valeri Kustovun həbs edilməsi ilə bağlı istintaqın vəsatətini təmin edib.
Oxu.Az RBK-ya istinadən xəbər verir ki, məhkəmənin qərarına əsasən, o, sentyabrın 29-dək həbsdə saxlanılacaq.
Kustovun nümayəndələri məsələ ilə bağlı şərh verməkdən imtina ediblər. Yaxın vaxtlarda "Efko"nun baş direktoru Yevgeni Lyaşenko barəsində qətimkan tədbirinin seçilməsi ilə bağlı vəsatətə də baxılması gözlənilir.
Yağ-piy sənayesi sahəsində fəaliyyət göstərən "Efko" Şirkətlər Qrupunun Direktorlar Şurasının sədri və əsas səhmdarı Valeri Kustov xüsusilə külli miqdarda dələduzluqda şübhəli bilinərək (Rusiya Cinayət Məcəlləsinin 159-cu maddəsinin 4-cü hissəsi) Moskvada saxlanılıb.
İstintaqın gedişi ilə tanış olan iki mənbənin RBK-ya verdiyi məlumata görə, "Efko"nun baş direktoru Yevgeni Lyaşenko da onunla birlikdə saxlanılıb.
Kustov "Forbes" jurnalının 2026-cı il üçün hazırladığı Rusiya milyarderləri reytinqində 144-cü yerdə qərarlaşıb. Nəşr onun sərvətini 1,1 milyard dollar dəyərində qiymətləndirib.
Bundan əvvəl həmin cinayət işi çərçivəsində "Efko" Şirkətlər Qrupunun inkişaf üzrə direktor müavini Yekaterina Kustova və qrupun idarəedici şirkətinin strateji inkişaf üzrə direktoru Vladislav Romantsev də saxlanılıblar. Onlar xüsusilə külli miqdarda dələduzluqda ittiham olunurlar. İyulun 29-da Moskvanın Meşşanski Rayon Məhkəməsi onların barəsində həbs qətimkan tədbiri seçib.
Hüquq-mühafizə orqanlarının irəli sürdüyü iddialar "Gələcəyin nəqliyyatı" pilotsuz aviasiya sistemlərinin yaradılması layihəsinin həyata keçirilməsi ilə bağlıdır. Həmin istintaq çərçivəsində daha əvvəl "Gələcəyin nəqliyyatı" şirkətinin baş direktoru və Samara vilayəti qubernatorunun keçmiş müşaviri Yuri Kozarenko həbs edilib. Bundan başqa, Rusiya Sənaye və Ticarət Nazirliyinin Pilotsuz Sistemlər və Robototexnika İdarəsinin rəis müavini Alla Polovçenya da saxlanılıb.
