Müxalifətdə olan Yaşar Partiyasının təmsilçisi Matan Kahana İsrail parlamentinin (Knesset) sədri vəzifəsinə seçilib. Onun namizədliyi 120 deputatdan 66-sı tərəfindən dəstəklənib.
Oxu.Az xəbər verir ki, bu barədə məlumatı "Ynet" portalı yayıb.
Kahana salamlama nitqində İsrail vətəndaşlarını barışığa çağırıb və ölkənin bütün əhalisini təmsil etmək niyyətində olduğunu vurğulayıb.
Yaşar Partiyasının lideri Qadi Ayzenkot bu seçimi alqışlayaraq, hadisənin ölkə tarixində yeni bir səhifə açacağına inandığını bildirib.
Oktyabrın 27-də İsraildə baş tutan parlament seçkisinin nəticələrinə əsasən, Baş nazir Benyamin Netanyahunun rəhbərlik etdiyi Likud Partiyası 27 mandat qazanaraq birinci olub. İkinci yerdə isə 21 mandatla əsas müxalifət qüvvəsi sayılan Yaşar Partiyası qərarlaşıb. Noyabrın 8-də İsrail Prezidenti İsxaq Hersoq parlamentə daxil olan partiyaların nümayəndələri ilə məsləhətləşmələrdən sonra yeni hökumətin qurulmasını Ayzenkota həvalə edib.
Qeyd edək ki, partiyaların əksəriyyəti prezidentə məhz Yaşar Partiyası sədrinin namizədliyini tövsiyə etmişdi. Qanunvericiliyə uyğun olaraq, həmin andan etibarən Ayzenkotun hakim koalisiya yaratmaq üçün parlament çoxluğunun dəstəyini əldə etməsi məqsədilə 28 günlük müddət başlayıb. Təyin olunmuş vaxt ərzində o, bu vəzifənin öhdəsindən gələ bilməsə, qanun bu müddətin daha 14 gün uzadılmasına imkan verir. Əgər yenə də koalisiya qurulmazsa, hökuməti formalaşdırmaq mandatı başqa bir namizədə veriləcək və onun bu tapşırığı yerinə yetirmək üçün əlavə uzatma hüququ tanınmadan 28 günü olacaq.