Əbu-Dabidə keçirilən mövsümün son "Formula-1" Qran-prisi çərçivəsində təşkil olunan "RM Sotheby's" hərracında indiyədək cəmi 12 ədəd istehsal olunmuş "Bentley Bacalar" rodsterindən biri satılıb.
Oxu.Az auto.ru-ya istinadən xəbər verir ki, ümumən 1 131 km yürüşü olan bu avtomobil 876 785 dollara alıcı tapıb. Halbuki modelin təqdimatı zamanı nadir sayılan, müasir tarixdə ən eksklüziv ikiqapılı "Bentley" kimi tanıdılan "Bacalar"ın ilkin qiyməti təxminən 2 milyon dollar idi.
"Bentley Bacalar" 2020-ci ildə təqdim olunub və o vaxt bu qeyri-adi modelin kolleksiya dəyəri daşıyacağı düşünülürdü, çünki buraxılması planlaşdırılan bütün avtomobillər əvvəlcədən sifarişlə satılmışdı. Lakin indi məlum olub ki, "Bacalar" nadir avtomobil kolleksiyaçıları arasında gözlənilən marağı doğurmur.
Kolleksiyaçı marağının aşağı olmasının mümkün səbəblərindən biri "Bacalar"ın texniki bazası sayıla bilər. Rodster "Bentley" üçün nisbətən kütləvi sayılan "Bentley Continental GT" platforması üzərində qurulub və 6.0 litrlik W12 mühərrik, 8 pilləli avtomatik ötürmələr qutusu və tam dartma sistem ilə təchiz edilib.
